《二月廿九》好評如潮 ViuTV嚟緊有咩自家製劇集?

近期穿越劇大受觀迎,好似有台劇《想見你》、內地劇《慶餘年》及ViuTV劇《二月廿九》。《二月廿九》綜合咗愛情同穿越元素,上星期播出以來討論度爆燈,唔少觀眾都大讚劇集有新意,係近年難得一見嘅佳作,不過劇集喺今晚就大結局。其實近年ViuTV都自家製劇集,等我地同大家睇下嚟緊有咩劇集啦~

《嘆息橋》

愛情懸疑劇《歎息橋》係由《綠豆》班底再次合作拍攝,男女主角仍然都係林保怡和周家怡,講述林保怡細細個已經努力工作,賺取媽媽嘅醫藥費,之後識咗周家怡,二人做咗好朋友並一齊打拼。劇集雲集好戲之人,有陳奐仁、伍詠薇、衛詩雅、Ming Sir劉兆銘以及郭鋒等等。

《打天下》

勵志動作劇《打天下》由歐錦棠、文頌嫻、談善言、MIRROR成員Anson Kong及張建聲等人主演,劇集以空手道為題,仲去到沖繩拍攝外景。劇集講述歐錦棠係空手道高手,不過因為被師兄嫉妒逐出師門,仲淡出空手道界。之後佢喺機緣巧合下遇到談善言、Anson Kong同埋葉麗娜,透過空手道訓練令佢哋三個慢慢建立自我。

《地產仔》

黑色幽默劇《地產仔》搵嚟鄭浩南、朱慧敏、余香凝、吳肇軒、胡子彤及廖子妤主演,鄭浩南飾演地產店老闆,余香凝做地產店分區經理,講述地產見習代理嘅辛酸。

《男排女將》

青春勵志劇劇《男排女將》有好耐冇拍港劇嘅鄧麗欣(Stephy)、顧定軒、MIRROR成員Ian、Anson Lo及Edan等人參演。劇情講述King(顧定軒飾)及Bobby(Anson Lo飾)因身高未能達標,所以被逐出甲一排球隊,之後遇上前香港女子排球代表隊成員蔣家瑜(Stephy飾)。佢哋令蔣家瑜重新愛上排球,更成為香港第一位男子排球女性教練。

《太平紋身店》係周秀娜首次為ViuTV拍攝嘅劇集

集犯罪、懸疑及愛情於一身嘅劇集《太平紋身店》,搵嚟周秀娜、林德信、柏天男及陳泂江等人主演,劇情主要講述香港太平街隱世紋身店嘅女紋身師Nana(周秀娜飾),佢會根據客人嘅奇幻經歷,然後幫佢哋度身訂造設計紋身,同時Nana嘅神祕身世亦會慢慢揭開。劇集原定喺香港、新加坡及台灣取景,不過因新型冠狀病毒肺炎疫情持續,前往新加坡後要先隔離14日先可以開工,所以ViuTV決定延期拍攝。

《搖滾校園》搵嚟MIRROR拍攝

青春歌舞劇《搖滾校園》,王貽興除咗公開招募素人擔任女主角之外,仲搵嚟MIRROR拍攝,淨係睇一班小鮮肉都夠晒新鮮感同吸引啦!