乖仔影帝崩壞 Eddie Redmayne變連環殺人狂

英國男神Eddie Redmayne變身做變態連環殺人狂?Eddie不論幕前幕後形象良好,過往飾演嘅角色,包括《霍金:愛的方程式》攞影帝嘅霍金、《怪獸與牠們的產地》中嘅魔法師Newt、《丹麥女孩》中嘅Lily等角色都係好人居多,現實亦鮮有醜聞、緋聞,形象健康正面。今次一改戲路,將會於新片The Good Nurse中飾演16年間謀殺咗超過400人嘅美國連環殺人狂。

電影The Good Nurse改編自真人真事,將根據由Charles Graeber所著嘅The Good Nurse: A True Story of Medicine, Madness, and Murder犯罪紀錄改編,電影劇本將由《1917: 逆戰救兵》編劇Krysty Wilson-Cairns執筆,《誣網》編劇Tobias Lindholm則會執導The Good Nurse。

故事講述外表斯文嘅男護士Charles Cullen (Eddie Redmayne飾演),表面為盡責醫護、丈夫、爸爸,實際以護士身份於醫院隨機殺害病人。Cullen16年間分別於9家醫院工作,期間私下給病人注射致命藥物,曾經有病人指控Cullen半夜為佢注射不明藥物,卻因為証據不足而俾Cullen甩身,仲因為醫療系統無相關通報機制,加上醫護人員不足,令Cullen可以不停殺病人,於被懷疑前轉職至另一間醫院繼續行兇!

最後因為一名護士(Jessica Chastain飾演)發現Cullen多次為病人申請不必要藥物及出入非由佢照顧嘅病人房間而起疑,冒住生命危險,與警方密切合作,先搵到証據捉拿Cullen!而呢位變態殺人狂聲稱因為唔想病人受苦先痛下毒手,只承認殺咗40人。

Cullen記唔起受害人名字,不過對於行兇過程卻記得相當仔細,令人髮指,而警方根據佢就職紀錄展開調查,過程發現受害人多達400名,成為美國史上殺人最多嘅殺人犯,被媒體稱為「死亡天使」!所謂知人口面不知心,Eddie Redmayne今次轉戰飾演外表純良、內在冷血仲毫無悔意嘅殺人狂,令人期待。

相信Netflix對此片亦非常有信心,剛剛用天價2500萬美元買下全球發行權,雖然上映時間未定,不過好大機會行《愛爾蘭人》、《婚姻故事》條路,先於少量戲院上映,再於自家平台上映,務求盡攬獎項提名,谷大點播率!總之點都好,香港觀眾實有得睇!