上《百萬富翁》衰咗畀人講一世 陳芷菁發誓:唔再參加問答比賽!

陳芷菁當年上《百萬富翁》,真係成為經典。

要講陳芷菁,除咗佢做司儀了得,係《今日VIP》常任主持外,就一定要數佢N年前上《百萬富翁》尷尬到唔敢睇呢一幕,唔少網友都話呢幕應寫入香港電視史冊。

佢當時話:「我讀Drama!」幾咁有自信!

時間似乎沖淡唔到一切,網上平台只要打「尷尬到唔敢睇」,就一定會搵到呢條片。當年芷菁上《百萬富翁》,其中1萬元嘅題目問:「以下那部不是莎士比亞四大悲劇之一?」芷菁當時擲地有聲答:「《羅密歐與茱麗葉》!」又自信滿滿話:「我讀Drama!」點知......正確答案係《奧賽羅》,真係人都癲。

同鄧梓峰上網台節目,唔怕講瘀事。

芷菁近日同鄧梓峰上網台節目時,就講番呢件宇宙超級無敵尷尬事,佢話:「我必需要講一樣嘢,大家記住無論任何問答比賽或選美,你哋要明白呢個係電視台製作嘅一個騷。第二點我的而且確真心話畀大家聽,我係錯咗。點解導致我錯呢,係因為我加拿大讀嘅,我真係唔知奧賽羅係Othello,我未見過嗰個字,我心目中《羅密歐與茱麗葉》係好慘呀,所以我認定係佢,其他三套嘅字我唔識。」

經一事,長一智,芷菁話自此都唔敢再口快快答問題:「我從此以後唔會再參加任何問答比賽。大家笑過就算喇!不過呢件都係一件好事,我被人笑過咪會醒啲囉!但點解呢樣嘢可以笑咁多年?」