《上流寄生族》跑出 奉俊昊好戲點止呢一套?

第92屆奧斯卡金像獎圓滿結束,頒獎禮節奏緊湊,表演環節有各地Elsa大合唱《魔雪奇緣2》主題曲,又有新晉小天后Billie Eilish深情獻唱Yesterday懷念離世電影人,仲有Eminem驚喜登場大唱2003年奧斯卡最佳原創歌曲Lose Yourself(同今屆入圍電影有咩關係?)。不過以上種種無助收視,典禮觀看人數再創史上新低,平均只有2360萬人觀看。

收視低迷唔出奇,今年入圍片單老實講有啲弱,大部份又估到哂邊個贏。唯一救返奧斯卡,令件事有返啲話題,就係南韓導演奉俊昊嘅《上流寄生族》獲得最佳國際影片、最佳原創劇本、最佳導演及最佳電影4項大獎,破哂韓片紀錄,仲成為92年嚟首部非英語片贏得最佳電影殊榮!

賽果令人大跌眼鏡,因為奧斯卡係美國主流盛事,《上》再好睇,照道理大獎都會留返俾自己人。上年《羅馬》呼聲再高,最後都要輸俾普普通通嘅《綠簿旅友》就知啦。所以戲都有自己嘅命運,《上》未必係影迷心中最好嘅韓片,不過時來運到,大獎自然入你袋!

由於受疫情影響,為保安全,唔少人都選擇留守家中,串流平台相信係其中一個熱門娛樂方式。大家不妨重溫奉俊昊導演其他經典作品。其中最多影迷推介嘅必屬以80年代中轟動南韓嘅連環兇殺案為藍本,由宋康昊主演嘅2003年作品《殺人回憶》。

奉俊昊自學生時代就非常關心社會議題,曾經係學運一份子嘅佢善於以電影探討政治問題,作品有票房有message,2006年嘅《韓流怪嚇》以漢江出現變種怪獸,民眾相繼走難又要打怪獸嘅災難片模式,票房取得空前成功,成為韓國最賣座電影之餘,亦不忘探討美韓關係!

就算進軍荷里活都不失自己風格,以作品回應社會議題。2013年《末世列車》挑戰科幻片種,有「美國隊長」Chris Evans、Tilda Swinton等大星演出,講述階級不平等,需要通過抗爭、革命解決問題。而2017年美韓合拍片《玉子》則有Jake Gyllenhaal、Lilly Collins、Paul Dano等人演出,以女孩美子(安瑞賢 飾)與罕有動物玉子嘅友情,探討動物權益。

奉俊昊導演親身示範拍合拍片唔駛一面倒照顧市場口味,最後以百份百韓片《上流寄生族》成功大放異彩,橫掃各大國際影展大獎,打入美國主流奧斯卡殿堂!因為《上》嘅成功,吸引HBO買下電視版權,而另一頻道TNT就買咗《末世列車》嚟拍劇,預計今年5月推出。韓國娛樂產業成功打入國際市場,証明擁有創作自由,忠於自己拍出好作品先係正確嘅事!