上半年娛樂圈大事回顧:朱智賢黎振燁/阿嬌離婚/馬國明湯洛雯相戀...

眨吓眼今年就過咗一半,頭半年嘅香港娛樂圈都發生咗唔少轟動嘅新聞,今日就同大家回顧一下啦!

朱智賢黎振燁車廂幽會斷正

上年4月有「安心偷食」事件,今年4月就爆出無綫上位小花朱智賢與港男人夫黎振燁喺《食腦喪B》時撻着,分別瞞住緋聞男友謝東閔及臨盆在即嘅老婆,喺車廂幽會兼食心形蛋糕。佢哋見到傳媒時嚇到即刻烏低身,黎振燁當時就話叫大家唔好誤會,佢哋唔係一齊,而朱智賢就神情呆滯。出軌事件曝光後,二人形象秒速插水,被無綫即時停工。無綫就安排咗謝東閔陪朱智賢開記招公開道歉,而黎振燁就冇影,不過佢喺接受傳媒訪問時就話出軌關係只係維持幾星期,仲已經得到太太原諒,現時就專心照顧太太同初生BB。

朱智賢&黎振燁

DJ細So被炒

受新冠肺炎影響,各行各業都經歷前所未有嘅衝擊,連電台亦都唔例外。喺2月嘅時候,商台已經安排員工放無薪假。去到4月,有傳效力咗20年嘅DJ細So(蘇耀宗)因員工健康及減薪等問題與上司發生爭執,而遭公司即日解僱。突然失業嘅細So除咗得到大量網民支持之外,仲多咗其他嘅工作機會,例如喺網上開live及寫歌。

細so

阿嬌與賴弘國離婚

鍾欣潼(阿嬌)與台灣「醫界王陽明」賴弘國喺前年5月結婚,今年5月各自承認結束14個月嘅短暫婚姻,消息震驚中港台。有傳離婚係阿嬌主動提出,佢仲喺2018年提出過一次,當時老公努力挽回,點知今年二月賴弘國去馬來西亞陪完阿嬌拍戲後,阿嬌再一次提出離婚。賴弘國亦承認離婚消息,原因係阿嬌已經唔愛佢,仲話阿嬌喺美國完婚後就已經後悔,但因為簽約真人秀,先要繼續扮恩愛。阿嬌亦透過經理人公司證實簽咗分居協議書,佢哋亦各自重投新生活。

鍾欣潼 & 賴弘國

馬國明湯洛雯承認戀情

娛圈鑽石筍盤馬國明早前被踢爆熱戀「靚湯」湯洛雯,二人隨即上載定情公仔照片到社交網站大方認愛,佢哋仲話係以結婚做前提交往,襯到絕嘅佢哋獲得全城祝福。一向不活躍於社交網站嘅馬國明,喺早前終於開設IG帳戶,仲每隔幾日就會更新,之後佢哋亦不時透過社交網站隔空傳情。

《心理追兇Mind Hunter》劇照

古天樂籌得3,900萬向業界人士派$9000援助金

新冠肺炎疫情嚴峻,各行各業都受到唔同程度嘅影響,而娛樂圈都不能倖免,電影業製作更幾乎停頓,不少從業員面臨手停口停,叫苦連天。有見及此,演藝人協會會長古天樂就聯同香港電影工作者總會進行籌款,唔少電影公司都有捐款,結果成功籌得3900萬。早前援助金已經開始陸續發放,每位申請嘅工作人員最多可以獲得9000元。

古天樂

許冠傑&郭富城開騷

喺4月中,歌神許冠傑喺尖沙咀舉行網上免費演唱會,期間唱出多首名曲,為疫情下全港市民打氣,官方平台就錄得超過644萬人次收睇。之後,天王郭富城被許冠傑嘅正能量所感染,於是喺5月頭舉行網上慈善音樂會,接力為香港人打氣,及為舞蹈員同埋電影幕後籌款。

許冠傑
郭富城

陸浩明失言

喺2月中播出嘅J2綜藝節目《#後生仔傾吓偈》討論「防疫意識」話題,元老主持陸浩明(6號)講到2003年沙士疫情時,佢竟然講出錯誤訊息,話沙士嘅源頭係香港,當時嚇到坐喺隔籬嘅馮盈盈即時澄清。由於言論嚴重失誤,唔少網民睇完都紛紛投訴及話要抵制佢代言嘅產品。事後,陸浩明除咗喺社交網站出Post道歉之外,佢仲喺電視城向大家公開道歉。

《#後生仔傾吓偈》截圖

金像獎頒獎禮改網上直播宣布賽果

以往嘅香港電影金像獎都係以實體頒獎禮進行,不過今年因為疫情嘅關係,大會決定《第39屆香港電影金像獎頒獎典禮》5月6日喺網上直播宣布賽果。最終電影《少年的你》成為大贏家,成功囊括「最佳電影」、「最佳女主角」、「最佳導演」及「最佳編劇」等8個大獎。

《少年的你》劇照