一早知 「明湯戀」!唐詩詠刻意唔踢爆

唐詩詠話一早知馬國明同湯洛雯拍拖。

「明湯戀」爆出後轟動全城,兩位主角馬國明和湯洛雯(靚湯)先後冧認戀情,不少人都留言送祝福,,至於跟馬國明傳了多年緋聞的「契妹」唐詩詠,就未有任何表示,只在社交平台寫佛偈。唐詩詠今日現身將軍澳電視城拍攝新劇《超能使者》,問到有否留意「明湯戀」時,她說:「點可以留意唔到。我個幾月前已經估到(佢哋拍拖),佢自己都講佢哋冇避忌,我收到各方消息,不過我哋冇問同冇踢爆,我有同(林)子善傾,子善話想問佢,我話唔好,我哋唔好問,畀啲空間佢發展,等佢親口同我哋個講。(馬國明有冇親口同你?)我真係太了解佢,佢從來唔講,佢只係畀咗個Emoji同講多謝,我哋都係睇報道先知,好為佢開心,不過子善就有啲嬲,因為想佢親口講。」

講到唐詩詠未有點讚馬國明於社交網認愛的貼文及留言,惹來外界揣測,她認為大家被社交網站影響太深:「鄭嘉穎社文網開咗兩年,我都冇畀過讚,黃翠如嘅貼文我都唔係每次畀Like,我同七成朋友喺社文網上係零互動,點讚係代表啲乜。呢件係開心事,唔好無風起浪,唔好用社交媒體去斷定個關係,咁就太膚淺,我哋嘅友誼唔需要加裂痕上去,咁係太幼稚,大家應該集中番佢哋身上。(你點解寫佛偈?)同(馬國明)呢件事冇關,我只係覺得段文字有意思。(你係咪祝福佢?)當然祝福,我係最開心,最近好多喜事,子善個BB出世,(鄭)嘉穎又做爸爸,佢又終於拍拖,下個應該到(黃)嘉樂。(你呢?)再下個就係我。(如果你拍拖會唔會公開?)我唔會公開,要睇另一半,我嘅愛情觀係可低調就盡量低調。」

提到與馬國明傳了多年緋聞,她說:「做兄弟冇所謂,都講咗咁多年,佢要請我食飯補償我,佢哋要煲靚湯畀我飲。(馬國明同靚湯有冇一齊出嚟見你哋?)冇,但相信之後會。(以往馬國明有冇帶過另一半出嚟?)有,但都係好後期,睇佢想幾時帶出嚟啦!」

她又指數年前在一個活動上見過靚湯,兩人雖然只接觸過一次,但傾得十分深入:「我同佢都係金牛座,佢好直率乜都可以傾。(啱唔啱做你阿嫂?)我有乜所謂,最重要係佢(馬國明)同佢阿媽鍾意,最重要佢開心,希望我都快啲帶個人嚟。」