【Hit 爆】《紅日》被網民改編 成《2月14顛沛流離》李克勤清唱找數

一年一度嘅情人節又到啦!唔少情侶們都趁今日盡情放閃,相信唔少打工仔今日喺office嘅討論話題都係離唔開邊個同事收花㗎啦!不過噚日有網民喺討論區開咗一個名為「「2月14顛沛流離」」嘅PO,將李克勤嘅經典歌曲《紅日》重新填上歌詞,變成情人節單身人士嘅主題曲《2月14顛沛流離》,歌詞啜核又抵死,啲字仲好似有聲咁。除咗即刻吸引到唔少網民追PO及喺網上瘋傳之外,連身在內地工作嘅李克勤都有留意到。

噚晚,李克勤喺社交網站上載咗網民改編嘅歌詞,佢仲留言話自己喺賓陽工作,知道大家咁俾面,佢本來都想唱一唱,反正自己唔係斯文人,不過又驚俾啲仔睇到聽到,因為小朋友學得好快。佢仲祝大家情人節快樂,單身嘅朋友可以盡快脫單。之後,唔少網民都紛紛留言大讚佢玩得,仲好想佢可以唱出嚟比大家聽。

今朝早喺內地機場嘅李克勤,一邊食住早餐,一邊祝大家情人節快樂,仲清唱咗兩句「2月14顛沛流離,2月14曲折離奇。」不過似乎仲未滿足到一班網民,有網民更跪求克勤唱晒成首。

有片:https://www.facebook.com/420540474789301/videos/2319957191657782/