【830檔期光復播港劇】《倚天屠龍記》播畢後 由呢套無綫自家製劇集接棒!

近年無綫經常喺黃金時間播放外購內地古裝劇,起初都只係安排7點播放,之後慢慢伸延去其他檔期播放,最高峰更試過黃金時段五綫劇中竟然有三套都係播內地劇,認真誇張呀!最近有消息指喺6月中播畢《倚天屠龍記》後,無綫將會播出自家製劇集《好日子》。等咗幾個月,8點半檔期終於光復播港劇,大家終於唔使睇內地劇啦!

上年年中,宮廷劇《延禧攻略》喺國內掀起追劇熱潮,無綫安排喺8點半播放亦都無可厚非,大結局收視高達39.2點,全劇嘅平均收視亦有31.3點,成為上年最高收視劇集。可能眼見內地劇嘅成績耀眼,無綫開始變本加厲,喺今年2月黃金時段五綫劇中竟然有三套都係內地劇包括7點播放嘅《獨孤天下》、8點半播放嘅《皓鑭傳》、及深宵播放嘅《如懿傳》。喺4月嘅時候,連星期六晚都播放埋由湖南廣播電視台製作嘅《小戲骨:包青天》,內地劇真係完全攻陷香港市民嘅日常生活。

其實喺播緊《皓鑭傳》嘅時候,唔少觀眾都好想無綫可以喺8點半檔期播放返港劇,不過無綫就繼續搵內地劇接手,播放由曾舜晞、陳鈺琪及祝緒丹主演全新版本嘅《倚天屠龍記》。劇集將於6月中播放大結局,而由新劇《好日子》接棒。

《好日子》由潘嘉德監製,搵嚟黃智賢、陳煒、張達倫、車婉婉、翟威廉、簡淑兒等人主演,劇集以圍村作為背景,講述村長兒子齊萬碩(張達倫飾)同好兄弟齊萬基(黃智賢飾)同樣鍾情卞慧晶(陳煒飾)。後來,齊萬碩同卞慧晶喺年少時酒後亂性,不過齊萬碩酒醒後選擇一走了之去咗澳州,而齊萬基就幫佢承擔咗呢個責任,但係呢個真相連局內人卞慧晶都唔知,只有佢哋兩個先知。多年嚟齊萬碩都唔想提起當年嘅事,但係佢個仔就返香港了解爸爸嘅過去,期間仲因為受咗傷,令到齊萬碩一定要返香港,最終令到當年事件被揭盅。

另外,有消息指播完《好日子》之後,無綫將安排播放由鄭則仕、苑瓊丹、邵美琪、黎諾懿及黃智雯等人主演嘅《街坊財爺》。