【逃稅風暴】低調現身工作室留到天黑 發福范冰冰疑鋪路復工

低調現身工作室留到天黑 發福范冰冰疑鋪路復工

陷入逃稅風暴嘅大陸女星范冰冰,被追繳及罰款共8.84億人民幣(約10億港元),可以用金錢換回自由,范冰冰一直深居簡出,表現得好低調。前日,有大陸傳媒在北京捕獲范冰冰,一身黑look嘅佢喺工作室留到天黑,唔知係咪為復工鋪路呢!

據大陸傳媒報道,前日記者拍到范冰冰同助手駕車抵達北京某棟高級辦公大樓。着咗超大size黑色羽絨嘅范冰冰,落車後即刻戴上黑超,耷低頭急步上樓,從相片所見,久未露面嘅冰冰塊面圓潤咗,冇以前咁尖下巴,睇嚟呢段冇工開嘅日子精神唔錯。冰冰喺工作室逗留到天黑,一行人才駕車離去。

有網民話冰冰雖然要繳交近9億人仔罰款,但依然可以坐名車出現,似乎經濟完全冇問題。范冰冰自陷入逃稅風暴後,神隱咗百幾日,直至今年10月才在微博蒲頭,為逃稅一事公開道歉,並承諾支付鉅額補稅及罰款。而早前台灣金馬獎引發台獨風波,范冰冰更一馬當先在微博貼「中國,一點都不能少」帖文,向中共表忠。