【網民鬧爆】安心偷食斷正 Big Big Channel開Live直播訪問馬國明媽媽

今日城中熱話莫過於黃心穎與許志安的士激吻片段曝光,影片流出至今當時人同佢哋嘅另一伴鄭秀文、馬國明都未有任何回應。Big Big Channel可能好擔心黃心穎同馬國明嘅情況,及想為觀眾帶嚟第一手消息,所以就搶先一步開Live直播訪問馬國明媽媽,仲用「馬明媽媽回應心穎事件」為題吸引觀眾收睇。

主持人林子博喺馬國明屋企樓下見到馬明媽咪,即問馬媽媽知不知心穎與許志安喺的士激吻一事。馬媽媽唔知道之餘,仲問邊到可以睇,之後林子博表示喺動新聞可以睇,不過佢話唔識用依啲新聞app。主持人馬上轉話題問馬媽媽有冇見過心穎,馬媽媽話︰「好耐冇見!佢有嚟拜年,之後就冇見過佢。」主持再問佢對心穎既印象,佢話無咩特別。對今次事件有咩睇法,馬媽媽就話「細路仔嘅嘢唔清楚。」

之後,主持人直接將片段播俾馬媽媽睇,點知佢電話突然響起,講咗幾句後佢同主持人講︰「佢話唔可以同你哋講咁多!」之後就走左,相信係馬明來電。

觀眾似乎對佢哋嘅直擊表示極之不滿。而佢哋亦都已經將影片刪除,平息民怨。