【狗仔出更】踢爆張建聲陳嘉莉假分手 蜜遊曼谷鬼祟返歸扮唔識

 

35歲張建聲去年憑網劇《反黑》彈出,今年4月忽然高調撇女友,在社交網宣布跟「翻版吳千語」陳嘉莉兩年情玩完,更傳出暗交33C日模松岡李娜和34C「籃球女神」方詠琳大玩四角戀;然而,兩人分手僅半年,日前被《蘋果》獨家直擊蜜遊曼谷後返港,全程保持距離扮唔識,最後同車返位於深水埗寓所,似乎之前四角戀只係一場大龍鳳,唔知係玩假分手定真翻撻呢!

當晚約10點幾,張建聲同聲稱已分手嘅舊愛陳嘉莉步出抵港大堂,兩人都戴咗口罩同cap帽遮樣,一前一後相距幾個身位,全程各有各行扮唔識玩避忌,一馬當先嘅張建聲推着行李車,上面放了兩個大旅行袋,篋都唔帶輕輕鬆鬆去旅行,張建聲出閘後一個箭步行去找換店兌錢,陳嘉莉則去櫃員機排隊撳錢,其間不停玩手機兼周圍望,警覺性好高。

兌完錢嘅張建聲快步向前行,以為佢同陳嘉莉玩分開走,而女方撳完錢後邊行邊周圍望,原來張建聲匿埋一角等女友,當見到陳嘉莉行過時,張建聲鬼祟地嗌了一聲:「喂!」女友望一望佢,之後即乖乖地跟在後面,張建聲全程都表現得好大男人,兩人保持距離落樓下,完全零交流交足戲,行到食煙位時,張建聲更粒聲唔出就去煲煙,陳嘉莉企埋一邊乖乖等候。

張建聲快扯咗一支煙,之後就見佢不停講手機,等咗差唔多10分鐘,又皺眉又叉腰好唔耐煩,終於接載嘅車輛抵達,兩人返抵位於深水埗嘅寓所,落車後張建聲兩手各攞一個行李,急急腳快步上樓,女友全程跟喺後面唔敢出聲,明顯被強勢男友食住。

其實喺佢哋合體嘅幾日前,張建聲曾在社交網貼相並留言:「帶著功課去旅行」,就係同陳嘉莉鬼祟去旅行;而陳嘉莉就十分小心,完全冇洩露自己行蹤,表現乖巧配合男友玩低調。兩人自從分手後,近月已暗暗恢復「來往」,陳嘉莉在社交網貼靚相,張建聲不避嫌給「心心」及「Like」關注,似有意翻撻前度,惟當時兩人都異口同聲否認,原來講一套做一套!

對於蜜遊斷正,張建聲今早以短訊回覆《蘋果》:「不作多回應了,多謝關心,一切隨心,順期自然就好。」Kelly緊接也回覆謂:「一切順其自然啦……」口供一致。

精選娛聞,喺晒《娛果》
http://fb.com/appledailyent 

(攝影:徐錦池、孔志豪)
兩人行到離行離列扮唔識(攝影:徐錦池、孔志豪)
陳嘉莉全程做跟尾狗
張建聲好似大爺咁
最近距離嘅合照
返到屋企樓下更加要扮唔識

 

等車其間終於企埋一齊
陳嘉莉戴cap帽口罩遮樣
細心望下後後後後面,先會見到陳嘉莉。
張建聲同樣戴cap帽口罩