【狗仔出更】傳有過億物業 素顏蔡少芬平民裝參加親子校外活動

(攝影﹕楊浩賢、孔志豪)

蔡少芬(Ada)真係夠眼光,老公張晉由窮武指變咗做當紅武打影星,財政全權交由老婆Ada揸fit。有傳Ada因為夠慳家,手持最少十層樓,市值過億,絕對係圈中小富婆!

Ada同張晉錫兩個女錫到燶,大女楚兒(湯圓)兩歲半時,佢哋原本住屯門獨立屋,但為咗方便小朋友喺紅磡返幼稚園,專登喺凱旋門購入一個1,200萬單位做「行宮」,真係闊綽。如今湯圓已經7歲,轉咗石門站一間國際學校讀小學,呢間學校都幾多星二代就讀,張栢芝兩個仔就係讀呢間,而卓林以前都讀過。

日前下午3點左右,Ada親自揸車去學校接湯圓放學,Ada打扮樸素,衫褲鞋都唔係名牌子,仲要素顏現身。但45歲嘅Ada無論樣貌同身材都keep得好好,Ada見到湯圓即笑晒口,原來當時仲未放學,老師帶埋一班學生參與課外活動,去附近寫生,又到凍肉舖巡咗一圈。

湯圓全程拖住一個同學仔,而Ada就拖實囡囡,沿途幫佢哋影相,表現得仲興奮過小朋友。期間有人認得Ada要求合照,Ada冇化妝都唔托手踭,叫湯圓企定定,佢就專心同街坊影相,非常難得,之後佢哋行返學校等放學。

Ada一見女兒就好開心

拖住囡囡講唔停
小心拖住小朋友過馬路
Ada同其他家長有傾有講
Ada沿途不停同囡囡及囡囡嘅同學仔影相,仲興奮過小朋友。
有途人搵Ada合照,佢都來者不拒。
Ada耐心聽小朋友說話
兩位小朋友真係好friend喎
Ada夠眼光,張晉由窮武師做到搶手打星,真係唔容易,一家四口樂也融融。(微博圖片)
一家去露營,享受家庭樂。(微博圖片)