【好叻女呀!】劉思希邊拍劇邊修讀全球第一EMBA課程

無綫藝員劉思希(Lisa)憑處境劇《愛‧回家之開心速遞》中飾演「洋洋」一角成功入屋,佢除咗忙於工作事業之外,佢仲選擇重返校園增值自己,呢一年嘅佢一邊熟讀劇本拍劇,一邊喺科大修讀EMBA課程,真係前途無可限量呀!

Lisa 11年落選港姐後加入娛樂圈,入行後曾經擔任無綫娛樂台主播,之後開始參與電視劇拍攝工作,例如《巨輪》嘅郭凱琳、《忠奸人》嘅Gillian、《迷》嘅爆牙醜女 肖小红及《愛‧回家之開心速遞》嘅洋洋都備受網民關注。《愛‧回家之開心速遞》中嘅洋洋係接龍集團市場部經理,成日要去同大小姐(林淑敏飾)匯報同開會,而龔燁(張景淳飾)就係佢上司。喺劇中,洋洋同熊若水(呂慧儀飾)、David(湯盈盈飾)、Helen(姚瑩瑩飾)及Rebecca(沈可欣飾)係好朋友,所以間唔中都會見到佢嘅演出。

好學嘅劉思希原來高材生,未入行前佢畢業於美國林肯大學行政管理碩士,而依家佢就喺科大修讀EMBA課程,呢個課程係全球EMBA課程連續三年排首位,每年只係錄取40至60人,入讀學生要持有學士學位及有10年或以上工作經,學費索價137萬港幣。另外,佢仲擁有國際葡萄酒品酒三級資格。

佢時不時都會上載自己溫書嘅相片去社交網站,好似喺今個月初佢就留言話:「化好妝+set好頭+背好劇本,在化妝間等埋位的時間最好做什麼呢⁉️答案係…爭取時間溫書!👩🏼‍🎓📚📜因為新年過後要拍劇,兩科考試同一大堆功課哦😣🙏🏻搞掂埋你地,讓我開開心心過年吧~! 最後衝刺🐏🐏加油!」