【內地網民鬧爆】甄子丹米蘭誤為「辱華」時裝品牌行騷 急發聲明拆彈

甄子丹作為「宇宙最強」,電影衝出國際已唔係新鮮事,2016年就去咗荷李活拍《俠盜一號:星球大戰外傳》,55歲子丹噚晚踩入時裝界,去咗米蘭時裝周,唔係做嘉賓睇騷,係做model行騷。

冇聽錯,冇寫錯,有圖有真相,子丹係擔任客席模特兒,為一個時裝品牌行騷,對於子丹嘅身高方面就眾說紛紜,根據維基顯示佢係173cm、約5呎8、而大陸傳媒亦寫過佢得167cm、約5呎5高。話明係「宇宙最強」,以子丹嘅星味同知名度咁高,年紀、身高根本唔係障礙,第一次行時裝騷獲大會安排做壓軸model,行出嚟chok爆嘅自信,壓台兼有氣場,與台上嘅6呎高小鮮肉男模比較,子丹一啲都唔輸蝕。完騷後,佢就分享行騷感受:「好耐無試過咁high,可能係第一次走上真正國際時裝舞台,同之前喺自己眼鏡品牌行騷感覺又不一樣。」

佢老婆汪詩詩當然有陪子丹去到米蘭,樂做跟得老婆,仲喺ig貼咗唔少相,佢同美國名媛Paris Hilton坐第一排睇騷,幫老公影行騷相,子丹仲有同品牌設計師Philipp合照留念。據知,品牌設計師Philipp早已看過子丹電影,認為佢係亞洲英雄,兩人碰面談天說地,惺惺相惜。

呢單新聞喺大陸就好有迴響,皆因呢個牌子早年曾涉及「辱華」風波,佢哋曾設計過一件印有「Fxxk You China」字樣tee,令到呢個牌子進軍大陸市場引起軒然大波。最後個牌子面對咁大嘅市場壓力都要道歉,不過喺道歉新聞稿入面,就畫咗一個留辮嘅人跪喺地上,唔少大陸網民就對子丹團隊無查清楚呢個品牌背景就合作嬲嬲豬。

今日5點,事件發酵唔夠12小時,已被內地網民鬧爆,子丹亦好有「關公」意識,知道事態嚴重,喺微博貼咗工作室聲明,留言:「無論何時、何地、何種形式,祖國堅決不容許侵犯。」聲明入面,提到「甄子丹工作室的團隊成員與該品牌合作前,未經深切了解而造成的疏忽鞠躬道歉。甄子丹先生獲知後已立即停止與該品牌的一切合作」。

子丹噚晚喺米蘭為時裝品牌行騷,唔夠12小時因品牌有「辱華」前科,決定發聲明劃清界線。(Ig/微博圖片)