【人魔大戰 】傳被黃子恆撩開房 迪子入行7年星運平平

36歲嘅無綫力捧上位小生黃子恆最近惹上桃色醜聞,前日被爆出偷食內地女粉絲,女方仲話發現懷孕四個月,之後黃子恆仲玩失蹤。一波未平,一波又起,噚日再有約炮短訊流出,被爆過往曾3次意圖撩35E歌手迪子到家中互相「服務」玩「人魔大戰」,但都俾女方拒絕,迪子直斥黃子恆唔尊重女性,仲寸佢連「撳鐘仔」嘅錢都慳。

相信唔少人未必認識迪子,其實佢係本地唱作歌手。原名林柏迪嘅迪子,3歲開始學琴,考獲8級鋼琴嘅佢,曾經喺本地獨立樂隊「1DOUBLE3」中擔任鍵琴手。佢曾經參加過音樂比賽獲得冠軍,喺11年獲台中嘉年華邀請去台灣表演。佢一直有寫歌嘅習慣,之後自己仲錄咗隻EP寄去唱片公司,之後簽咗佢。11年推出自己一手包辦所有歌曲嘅作曲、填詞及編曲嘅首張個人EP《愛‧幻想》,可惜佢星運平平,風頭被其他同期出道歌手(林欣彤、許廷鏗等)蓋過。

佢嘅代表作應該係佢14年嘅作品《流浪記》,唔知大家有冇聽過呢?呢首歌除咗有獨唱版之外,仲有同吳業坤合作推出男女對唱版,廣受好評。但後來與公司解約,自組工作室。15年為微電影《一個女助手的故事》擔任女主角及推出首張個人hi-res USB single《回憶氣味》。

早前迪子仲承認自己曾到韓國整容,接受咗三項臉部手術。原因係佢上年10月喺首爾一間餐廳跌倒,除咗手腳多處撞瘀之外,嘴亦縫咗23針,情況嚴重到近乎毀容。事後,佢將意外受傷破相、整形手術同康復嘅過程,寫成新歌《美哉》並拍攝MV來鼓勵自己。早前,佢上咗Yahoo TV 自家製娛樂節目《Mean傾》以過來人身份剖白整容嘅心路歷程。

今年佢喺書展推出新書《AMOR FATI》整容日記+CD同大家分享整容感受及小貼士。今年9月,佢仲舉行咗首個售票音樂會。