「御用奸人」戴志偉轉做保險 轉行撈得掂嘅藝人仲有佢哋!

唔少人都對娛樂圈呢一行充滿幻想,但其實好多藝人喺華麗背後都有生活嘅壓力,始終娛樂圈收入唔穩定。所以唔少藝人都會選擇退出,轉行做生意。

現年58歲嘅無綫「御用奸人」戴志偉,喺1981年加入無綫藝員訓練班,同期有劉德華及梁家輝等等。畢業後就加入無綫拍劇,過往飾演過無數角色,不過都係做反派角色居多,例如《新紮師兄》嘅張家明、《鹿鼎記》嘅鄭克塽、《神鵰俠侶》嘅趙志敬及《創世紀》系列嘅許文坤等等。1999年開始投身保險業,2011年因為無綫要求佢簽一年一騷,佢感到「不受尊重」而離開全身轉投保險業,而家仲升至分區高級經理。依家嘅戴志偉就話自己生活無憂,得閒就去旅行、做運動,仲會同朋友開演唱會。其實除咗佢之外,以下呢班藝人都證明畀大家睇,佢哋就算唔係喺娛樂圈搵食,喺其他行業都可以靠自己闖出一片天。

黎姿

黎姿(Gigi,現已改名為黎珈而)當年將讀書嘅機會俾咗細佬黎嬰,而自己就加入娛樂圈賺錢養家,過往仲拍過唔少電影及劇集,最經典嘅一定係電影《古惑仔》系列嘅細細粒同埋劇集《金枝慾孽》 嘅玉瑩小主,成為紅極一時嘅當家花旦。不過喺2007年細佬遇上嚴重車禍,黎姿即時放低所有工作,全心全意照顧細佬。2008年仲放棄如日中天嘅演藝事業,接手細佬黎嬰創立嘅醫學美容公司。由一線花旦變身女強人,,2009年開設第一間醫學美容中心,2017年公司喺港交所創業板上市,今年佢仲成功將公司從創業板升至主板上市。

徐菁遙(前名徐淑敏)

徐菁遙(Suki,前名徐淑敏)喺2006年參選港姐,雖然三甲不入,只係得到「旅遊大使獎」,不過因為甜美外表及豐滿身材而被無綫力捧,更被傳媒封為新一代「咪神」。2009年與飲食界才俊黃浩奉子閃婚,之後淡出娛樂圈,現時育有3個可愛女兒,做幸福少奶奶。雖然生活無憂,不過Suki仍然努力增值自己。喺2012年發展美容生意,研製護膚品創立個人美容品牌,2016年以8位數字將品牌賣出,短短4年賺過千萬,真係好叻女呀!除咗搞美容生意之外,Suki更不停學習,獲美國國際美洲大學頒發榮譽工商管理博士、報讀珠寶鑑證課程及赴東京報讀法國藍帶課程等等。

蔡子健

蔡子健喺1993年加入無綫藝員訓練班,初期以主持兒童節目為主,1997年開始主持旅遊節目同埋參演劇集,例如《陀槍師姐3》、《翻新大少》、《師奶股神》及《仁心解碼》等等。喺2010年完成工商管理碩士課程,同年離開無綫,轉職財務策劃師。

陳妙瑛

陳妙瑛喺1993年參選港姐,雖然三甲不入,有觀眾緣嘅佢只得「最美麗相中人獎」。之後,佢隨即加入無綫拍劇,更獲力捧做女主角,多年嚟有演出唔少經典角色,當中包括《花木蘭》花木蘭、《金玉滿堂》辛小小、《洗冤錄》聶楓及《無頭東宮》楚楚/凌雲等等,憑精湛演技,成為當家花旦。不過佢喺拍完《無頭東宮》後就息影離巢,轉戰商界。除咗豐胸丸公司、化妝學校之外,佢仲有開酒吧同埋經營食品生意,成為身家過億嘅富婆。

蕭潤邦(Oscar)

喺2007年,蕭潤邦(Oscar)曾經以組合Bliss身份出道,不過星運平平,冇幾耐佢就離開樂壇,仲去咗上海做模特兒。喺上海嗰段時間,佢由朝到晚都食生煎包,之後仲跟上海師傅學整正宗生煎包。返香港後,佢就轉行做飲食業,開咗第一間生煎包店。雖然初期遇上唔少困難,不過都能成功克服,現時每日更賣出超過5千隻生煎包。最近投資七位數字嘅第五間分店開張,Oscar仲話今年計劃再開多三間分店。

袁彌明

袁彌明喺2005年參選香港小姐後入行,不過演藝事業發展平平,所以2007年離開無綫,拍片放上網分享化妝美容心得。兩年後創立護膚品和健康食品專門店,起初佢由網上收單去到交收都一腳踢。後來,公司發展越嚟越好,唔少品牌主動搵佢傾合作,到而家每年經營逾1億元嘅生意。變身商界女強人嘅佢,喺上年成功將創辦嘅生活百貨喺港交所創業板上市。今年係公司成立10周年,上月中更開設第10間分店,袁彌明仲話希望未來兩年可以開多3至4間分店。

鄺美雲

「鄺美人」鄺美雲(Cally)喺1982年參選港姐奪亞軍後入行,歌影雙棲發展不俗,出過嘅唱片至今超過30張。1997年開始淡出樂壇,修讀珠寶設計課程,1999年考取G.I.A.研究寶石學家文憑。2000年轉型成為珠寶商人,開設個人珠寶店,生意搞得有聲有色,更有傳佢擁有5億元身家。