《鐵探》何佩珉演冷血狙擊手令人眼前一亮 私底下係楊盼盼徒弟

無綫重頭劇劇《鐵探》唔經唔覺已經踏入結局週,劇情亦越都嚟越緊張刺激。除咗實力派演員演技大鬥法之外,一班新演員亦落力演出,睇到觀眾相當肉緊,好似飾演越南女狙擊手江麗瑤嘅何佩珉(Mandy)令人眼前一亮。

劇中何佩珉飾演嘅江麗瑤,初頭同阿喱(林敬剛飾)係對相愛嘅情侶,不過佢係為咗報仇而接近營長(吳廷燁)同阿喱佢哋。之後,江麗瑤變得心狠手辣,更親手將阿喱殺死。佢仲同Iris(蔣祖曼飾)講電話:「我向阿喱開咗四槍,頭三槍冇攞佢命,令佢驚,等佢望住我,令佢臨死嗰一刻記住,越南女人係識得反抗嘅。到第四槍,我對準佢心臟射落去,睇住佢死不瞑目嘅樣,我真係好開心。」喺呢一幕,講嘢平時斯斯文文嘅何佩珉,成功演繹冷血狙擊手,睇到觀眾心都寒埋。不過喺噚晚嗰集,營長識穿咗江麗瑤嘅報復計劃,所以被營長殺死。

現年27歲嘅Mandy樣子甜美,5歲已經開始習武,學習蔡李佛,曾經喺香港武術隊跟操。2011年參加無綫武術選秀節目《功夫新星》獲得冠軍後入行,曾經參演嘅無綫劇集包括《飛虎II》、《潮拜武當》、《城寨英雄》、《使徒行者2》、《宮心計2深宮計》、《兄弟》及《荷里活有個大老千》等等。至於電影方面,Mandy喺《辣警霸王花》成為女主角之一。除咗係一位女藝人之外,Mandy亦係楊盼盼徒弟,平日參演電視劇及電影更會親自做「替身」及兼職擔任訓練動作特技人教官,可以話真係不得之了。

另外,由文偉鴻作監製嘅劇集《唐人街》,由武術指導郭振鋒帶領Mandy擔任副武術指導,Mandy更表示擔任武術指導比演員更辛苦,因為一有空閒就要睇返演員所拍嘅鏡頭,同再次教導動作,試過連續4日早夜更連接,真係連少少想休息嘅時間都冇。不過佢就話見到鏡頭出嚟嘅效果好睇,就會覺得辛苦都係一種享受。

至於感情方面,上年4月何佩珉與拍拖2年嘅工程師男友歐遊,期間男友向佢成功求婚。喺今年3月,正式升呢做人妻。不過佢就話因為事業剛起步,所以同先生都未有急於生BB嘅計劃。