《愛・回家》主題曲 黃心穎被滅聲!「安心偷食」終極片段曝光

噚日嘅「安心偷食」男女主角許志安和黃心穎喺車廂纏綿片段曝光,轟動全城,成為唔少人討論嘅話題。片段出街後唔少人都疑惑,究竟佢哋有冇一齊落車呢?而啱啱就有終極片段曝光,謎底正式解開!

原本16分鐘嘅片段中,除咗「安心」之外,仲有一位男友人,當時男友人仲話送心穎返屋企先,但被心穎粗口慰問,後來「安心」先送男友人到大坑。當男友人落車之後,「安心」異口同聲話去鯉魚門,期間十指緊扣、激吻又胸壓。之後,司機問喺邊度落車,心穎回答「去到燈位轉右呀,唔該。」,之後條片就完結。

去到今日,有終極片段曝光,原本坐到好低嘅安仔,終於坐返直,將手提電話放返好,仲好細心咁提埋心穎要放返好部手提電話。而心穎就幫安仔拉低cap帽,齊齊為落車做準備。到達目的地後,心穎就同司機講:「呢度呢度,唔該。」然後佢哋就齊齊落車。

另外,有好收視同好口碑嘅無綫處境劇《愛.回家之開心速遞》,因為由黃心穎所唱嘅主題曲《在心中》,唔少網民揚言話要罷睇。無綫順應民意,由今晚嗰集起《愛.回家之開心速遞》抽起咗心穎唱嘅主題曲,改用純音樂。