《守護神之保險調查》下週一首播 製作揼本演員卡士強勁

由邵氏兄弟及愛奇藝聯手打造嘅《守護神之保險調查》將會緊接《兄弟》喺下星期一出街,睇預告片已經令唔少人嗌期待。劇集卡士強勁,搵嚟苗僑偉、黃宗澤(Bosco)、劉心悠及徐子珊領銜主演,仲有許紹雄、吳岱融、艾威、邵美琪、溫碧霞、姜皓文、張松枝、談善言、MC Jin、歐凱淳、林耀聲、麥長青、林德信及龔慈恩等人主演,咁多好戲之人,相信有一定嘅叫座力。

今次劇集以保險調查員為題材,向大家揭露保險業秘聞。劇集除咗喺香港及內地拍攝之外,劇組更遠赴馬來西亞及捷克拍攝外景。劇情主要講述保險調查員張東(苗僑偉飾)、百天明(黃宗澤飾)及杜心茹(劉心悠飾)面對每一單保險案件時,憑不凡身手同智慧抽絲剝繭,為事件尋找及守護真相,偵破保險奇案。喺調查案件時,當中不乏追車、爆炸、槍戰及打斗等場面為劇集增添動作元素,增加緊張氣氛,刺激觀眾眼球。Bosco同劉心悠喺劇中飾演一對歡喜冤家,喺早前北京舉行發佈會嘅時候,Bosco仲大爆今次同劉心悠嘅牀戲係佢拍劇有史以來最激烈嘅一次。

另外,係人都知無綫嘅劇集及外購劇,絕大部分都係搵「星夢娛樂」嘅歌手唱主題曲,仲一直被批評歌曲洗腦兼粗製濫造。吳若希、菊梓喬、胡鴻鈞及鄭俊弘嘅歌聲,真係聽到悶,有時都唔知邊首打邊首。但今次為擺脫洗腦歌風格,搵咗「天生歌姬」A-lin唱主題曲,仲有國語及廣東話版本。除咗A-lin唱主題曲之外,仲有品冠及黃齡為劇集唱插曲,真係充滿新鮮感。